This blog is dedicated to my home town Negombo, its people, its history, culture, its life, politics and the norms and the values which I learned from them.

Wednesday, 10 June 2015

ඩබල් ඩෙකර් රථ මීගමුවේ නැවත දුවවමු ද ?



මේ දිනවල 'Old Ceylon Facebook' පිටුව සහ වෙනත් වෙබ්අඩවි කිහිපයක 1980/90 දශකවල අගභාගය දක්වා මීගමුවේ පාරවල් වල ධාවනය වූ පැරණි ඩබල් ඩෙකර් (London Route master) බස් රථයක ඡයාරූපයක් පල කෙරේ. මේ එම ඡයාරූප යයි. කාලයක් තිස්සේ මා එකතු කළ මීගමුවේ පැරණි ඡයාරූප මගේ Facebook පිටුවේ විටින් විට පලකරන බැවින් ඉහත ඡයාරූපය දුටු කිහිපදෙනෙක් මාවද එම ඡයාරූප වලට tag කර තිබුනි. එහෙත් මා දැනට රැස්කර ඇති මීගමුවේ පැරණි ඡයාරූප එකතුවේ Old Ceylon Facebook පිටුව පලකල ඉහත ඡයාරූපය ඇතුළුව තවත් මීගමුවේ පාරවල් වල ධාවනය වූ බස් රථ 09 ක පැරණි ඡයාරූප තිබේ. එම බොහොමයක් ඡයාරූප 1970 දශකයේ අග භාගයේ සිට 1990 දශකයේ මැද දක්වා කාලය තුල ගනු ලැබූ ඡයාරූපය. ඒවා අතර ඩබල් ඩෙකර් බස් රථ මෙන්ම සාමාන්‍ය බස් රථවලද ඡයාරූප වේ. 



මේ මීගමුව -පෝරුතොට පාර - කොච්චිකඩේ (907 බස් මාර්ගයේ) ධාවනය වූ ඉන් එකකි. මේ ඡයාරූපය 1987 දී මීගමුව වැල්ල වීදියේ විජයරත්නම් පාසැල සහ හින්දු කෝවිල අසලදී විදේශීය සංචාරකයෙකු ගේ කැමරාවට හසුව තිබිණි. මෙම මාර්ගයේම ධාවනය වූ තවත් සාමාන්‍ය බස් රථයක් මීගමුව වැල්ලවීදිය කනත්ත අසල දී ඡයාරූපයට නගා තිබී සොයා ගත හැකි විය.  

එම ඡයාරූප දෙක සමග පහත පලකරන  ඩබල් ඩෙකර් බස් රථ දෙක මීගමුව කොටුව පිට්ටනිය අසල දී ඡයාරූපයට නගා තිබුණි. මින් එක් ඡයාරූපයක් ඉකුත් පොදුරාජ්‍ය මණ්ඩල සමුළුව ශ්‍රී ලංකාවේ පැවති සමයේදී මගේFacebook පිටුවේ 'My Home town Negombo, post no.21' යන තේමාව යටතේ 10 November 2013 දින පලකලේය. 

ඒ පාරවල් 'ෂැම්පෝ' දමා හෝදමින් අනවශ්‍ය ලෙස රටේ ජනයාගේ මුදල් නාස්තිකරමින් පොදුරාජ්‍ය මණ්ඩල උළෙලෙකට මුදල් වියදම් කරන අතරතුරේ මීගමුව බස් ඩිපෝවේ තවමත් අලුත්වැඩියාවකින් තොරව ගාල් කර ඇති ඩබල් ඩෙකර් බස් රථ කිහිපයෙන් එකක් හෝ අළුත්වැඩියා කර පාරට දැම්මේ නම් අඩුම තරමින් පොදුරාජ්‍ය මණ්ඩල උළෙලේ ඉතා කුඩා ප්‍රයෝජනයක්වත් රටේ සාමාන්‍ය ජනයාට ලැබිය හැකිවිය හැකියැයි සටහන් කිරීමටය. අනෙක් අතට, බ්‍රිතාන්‍ය සහ ශ්‍රී ලංකාව අතර යටත් විජිත යුගයේ සිට පැවැත එන සම්බන්ධතා සිහිපත් කරන පොදුරාජ්‍ය මණ්ඩල උළෙලේ දී මේවැනි ඩබල් ඩෙකර් (London Routemaster) බස් රථ නැවතත් පාරේ දිවිය හැකිවිනි නම් කෙතරම් අගනේද ? ඒ සම්බන්ධයෙන් කිසිම අවධානයක් යොමුනොවන ලදී. 

එහෙත් අපි මීගමුව සිට කොලඹ, කටුනායක, රද්දොළුගම, මඩම්පැල්ල, දිසාගෙවත්ත, කිබුලාපිටිය, වෙන්නප්පුව ආදී මාර්ග ගණනාවක දිවූ  ඩබල් ඩෙකර් බස් රථ අමතක නොකරමු. ඒ අපි කාලයක් එහි ගිය, එහි ආශ්වාදය විදි පිරිසක් නිසාය. එදා මේ බස් රථවල ගමන්කල, පාසැල් ගිය අපේ වයසේ බොහෝ දෙනෙක් අද පිටරට වල ජීවත් වේ. ඔවුන්ගෙන් ඇතැමෙක් මීගමුව නමින් විවිධ සමිති-සංවිධාන තනාගෙන විවිධ කටයුතුවලට උරදේ. එහෙත් අප සියල්ලන් එකතුවී හෝ නැවතත් මෙම ඩබල් ඩෙකර් බස් රථ වලින් එකක් හෝ අළුත්වැඩියා කර මීගමුවේ පාරවල්වල දිවීමට සැලැස්වූවහොත්, එදා මෙම ඩබල් ඩෙකර් බස් රථවල ගොස් අප ලැබූ ආශ්වාදයත්, මීගමුවේ ක්‍රමයෙන් දිය කරමින් හරින අනන්‍යතාවයත් අද පරපුරටද නැවත ලබාදිය හැකිවෙනු ඇත.

මාකස් ප්‍රියන්ත පෙරේරා. 
10/06/2015

4 comments:

  1. ඇත්තෙන්ම තට්ටු දෙකේ බස් වේගය අතින් කොහොම වෙතත්, විනෝදය ලබමින් ගමනක් නිවීසැනසිල්ලේ යන්න හරිම අගෙයි. තට්ටු දෙකේ බස් රථවල උඩ තට්ටුවේ පසුපසම ආසනය සහ යට තට්ටුවේ ඉදිරිපසම ආසන දෙක අපේ කාලයේ ප්‍රසිද්ධ 'පෙම් මුළු' වශයෙන් තිබුණා.

    සංචාරක ව්‍යාපාරය වෙනුවෙන් තට්ටු දෙකේ බස්වල උඩ තට්ටුවේ වහලය ඉවත්කර ප්‍රයෝජනයට ගතහැකියි.

    මේ ලිපියේ ඇති සෑම තට්ටු දෙකේ බසයකම වහලයේ ඉදිරිපස පරීක්ෂාවෙන් බලන්න. ඔබට පෙනෙනවා ඇති, ඒවා තැලී ඇති බව. මෙයට හේතුව, මාර්ගයේ ඇති ගස්, දුරකථන/විදුලි කණු, පාරට බර වැඩි ගොඩනැගිලි වල වහල, ආදියේ මේ බස් ගැටීම. ඒ නිසා මේ බස් නැවත යෙදවීමට පෙර ඒවා ගමන්කරන මාර්ග ඊට ගැලපෙන ලෙස සැකසිය යුතුයි.

    ReplyDelete
    Replies
    1. හරියටම හරි, ඒ හැම බස් එකකම උඩ තට්ටුවේ වහල කොහේ හරි වැදිලා, ඒහින්දා මේ බස් වලට කලින් ඒවා දුවන පාර හදන්න ඕනෑ. මේ බස් ඒකාලේ ස්කොලේ ළමයින් සහ පෙම්වතුන් අතරේ තමයි වැඩිපුර ජනප්‍රිය.

      Delete
  2. ඔය වගේ ඩෙකර් 2005දි විතරත් මීගමුවෙ පාසල් සේවයටත් දාලා තිබ්බා. පාසල් සේවය නැති වෙලාවට මේකෙ ඩ්‍රැයිවරයා එක ළමයෙකුටවත් නවත්වන්නෙ නෑ බස් එක. නැවතුවමට පස්සෙ හරි මුලින් හරි නවත්වලා සෙනඟ බස්සලා ඉගිල්ලෙනවා. එවලෙට නම් අපි තියන්නෙ කෙලවෙලාම පල කියලා.

    ReplyDelete
    Replies
    1. ඇත්ත ද, 2005 වෙනතුරුත් දිව්වානම් දැන් ඩිපෝ එකේ අහුමුලු වල ගාල් කරලා තියෙන එක අපරාදයක් !!!

      Delete